Komisioni për Buxhet mblidhet sot, në fokus projektligje për kredi dhe buxheti i Zubin Potokut

Komisioni për Buxhet i Kuvendit të Kosovës do të mbajë sot mbledhjen e radhës, ku pritet të shqyrtohen disa çështje me rëndësi financiare dhe zhvillimore për vendin.

Mbledhja do të zhvillohet me fillim nga ora 14:00, dhe do të drejtohet nga kryetari i Komisionit për Buxhet.

Në rendin e ditës, përveç miratimit të rendit të ditës dhe procesverbalit të mbledhjes së kaluar (13 shkurt 2026), një nga pikat kryesore është shqyrtimi i Buxhetit të Komunës së Zubin Potokut për vitin 2026.

Po ashtu, anëtarët e komisionit do të diskutojnë disa projektligje që lidhen me marrëveshje kredie ndërkombëtare. Ndër më të rëndësishmet është Projektligji për ratifikimin e marrëveshjes së kredisë me Fondin Saudit për Zhvillim për projektin e rrugës me shpejtësi të lartë Prishtinë–Mitrovicë, si dhe marrëveshja me Bankën Evropiane për Investime për projektin e energjisë diellore fotovoltaike në KEK – Porta Globale.

Në shqyrtim do të jenë edhe marrëveshje të tjera me Bankën Evropiane për Rindërtim dhe Zhvillim, që përfshijnë projekte për trajtimin e ujërave të zeza në Podujevë dhe rritjen e efiçencës së energjisë në ndërtesa publike.